Rababarakaka

Þessi er mjög góð og alls ekki óholl. Kakan er ekki mjög sæt en þeim sem finnst gott að finna rababarabragðið líkar vel við þessa köku og svo er hún afskaplega einföld.

375 g rababari
60 g sykur

Skera rababara í 2 cm bita. Sett á kalda teflonpönnu ásamt sykri og hitað þar til að sykur hefur bráðnað og vökvi myndast. Malla í ca 2- 4 mín. Taka af hita og kæla.

2, 5 dl léttmjólk
50 g sykur
3 egg
2 tsk vanillusykur
75 g hveiti/spelt
50 g möndluflögur
2 tsk flórsykur

Mjólk, sykur, egg, hveiti og vanillusykur sett í matvinnsluvél og þeytt í 1-2 mín. Gott að nota töfrasprotann. Rababarinn settur í eldfast mót og deigblöndunni hellt yfir. Möndluflögum stráð yfir og bakað við 200°C í 40 - 60 mín. Flórsykur sigtaður yfir áður en borið fram. Gott með ís eða rjóma.

Jarðhnetusmákökur

125g hveiti
1 tsk lyftiduft
50 ósaltar jarðhnetur
50g mjúkt smjör
50g jarðhnetusmjör
100g sykur
1 egg
1 vanillustöng

Hitið ofninn í 200°C. Blandið hveiti og lyftidufti saman. Saxið jarðhneturnar gróft.
Þeytið smjör, jarðhnetusmjör, sykur og egg vel saman. Bætið þurrefnunum út í og hnoðið deigið. Kljúfið vanillustöngina og skafið fræmaukið úr. Bætið fræmaukinu og jarðhnetunum út í deigið.
Mótið 16 litlar kúlur úr deiginu með höndunum. Ýtið aðeins á þær með fingurgómunum. Leggið smjörpappír á bökunarplötu og raðið kúlunum á með hæfilegu millibili.
Bakið í miðjum ofni í um 10-15 mínútur. Kælið á kökugrind.

Súkkulaðifondant

fyrir sex
350g dökkt gæðasúkkulaði
50g mjúkt ósaltað smjör, ögn meira fyrir formin
150g sykur ("caster sugar", sem er fínmalaðri, ef til)
4 stór egg, hrærð með slettu af salti
1 tsk vanilludropar
50g hveiti
6 litlar eldfastar skálar/bollar

Setjið ofninn á 200°C ásamt bökunarplötu.
Klippið út passlega hringi úr bökunarpappír og setjið í botninn á skálunum.
Bræðið súkkulaðið yfir vatnsbaði og leyfið því að kólna aðeins.
Þeytið smjörið og sykur, og smám saman bætið við eggjum og salti, síðan vanilludropum. Setjið því næst hveitið saman við og þegar blandan er orðin jöfn og fín, setjið þá súkkulaðið saman við varlega með sleif.
Skiptið blöndunni á milli skálanna, setjið þær á heita bökunarplötuna og bakið í 10-12 mín.
Hvolfið á dessert-disk fyrir hvern og einn og setjið stóra flotta vanilluískúlu/rjómaslettu/créme fraise ofaná.

Hægt er að útbúa réttinn fyrirfram og geyma í ísskáp fram að kveldi. Þá þarf að baka í um 2-4 mínútur aukalega.