Vetrarkjúklingapottur - Chicken and barely stew

3 kjúklingabringur
1 msk ólífuolía
1 blaðlaukur, skorinn í 1sm sneiðar
3 sellerístönglar, skornir í grófa bita
1 hvítlauksgeiri, skorinn fínt
1 rauður chilli, skorin fínt
2 lárviðarlauf
3 rósmarín stönglar
100 g bygg
1.8 L heitt grænmetissoð
100 g frosnar grænar baunir

1. Setjið kjúklinginn í pott, hellið köldu vatni og látið suðu koma upp. Látið malla í 10 mínútur. Leyfið bringunum að kólna í vatninu.

2. Á meðan kjúklingurinn sýður, hitið olíu á stórri pönnu og steikjið lauk og sellerí við vægan hita í um 10 mín eða þar til mjúkir. Hrærið saman við hvítlauk, chilli, lárviðarlaufum, rósmaríni og bygg og steikið í 1 mínútu. Kryddið með salti og pipar. Hellið út á um helmingnum af soðinu og látið suðu koma upp. Setjið lok á pönnuna/pottinn og látið malla í um 25-30 mínútur, hrærið af og til, þar til byggið er mjúkt undir tönn.

3. Takið kjúklinginn úr soðvatninu og rífið gróft niður. Setjið út á pönnuna ásamt baununum og afgangnum af soðinu. Hitið vel í um 3 mínútur áður en borið er á borð ásamt góðu brauði og smjöri.

DELISH.

p.s. ég átti ekki blaðlauk svo að ég notaði bara venjulegan lauk. Þetta er ekta vetrarréttur, hlýjar manni og er svo góður á bragðið.

Cajun-kjúklingapasta

Frábær uppskrift - líka í matarboðið og saumaklúbbinn

Vil endilega deila þessari frábæru uppskrift með ykkur. Bauð Berglindi og Þorsteini upp á þetta í gær....

2 kjúklingabringur skornar í bita
linguine eða tagliatelle soðið al dente
2 tsk cajun kryddblanda (td frá McOrmick fæst í bónus)
2 msk smjör
1/4 blaðlaukur (eða 1-2 vorlaukar)
1 hvítlauksrif
1-2 bollar matreiðslurjómi
2 msk sólþurrkaðir tómatar, skornir niður i bita
1/4 tsk basil
salt og pipar
parmesan ostur

1. Setjið kjúklinginn í skál með cajun kryddinu og blandið, látið standa á meðan að hitt er undirbúið.

2. Steikið kjúklinginn í smjörinu við miðlungshita þar til að hann er eldaður í gegn ca 5-7 mínútur

3. Minnkið hitann og bætið út í lauk, hvítlauk, rjóma, tómötum, basil og kryddi og látið hitna upp.

4. Þegar pasta er tilbúið þá er öllu blandað saman og borið fram með parmesan osti.

Sjálf tek ég kjúklinginn af pönnunni þegar að hann er tilbúinn og léttsteiki blauðlauk og hvítlauk áður en ég blanda öllu saman á pönnunni í skrefi 3.

Tortillur með kjúklingi

Fínn hversdagsmatur eða fyrir matarboðið!

Uppskrift fyrir fjóra
Þrjár kjúklingabringur
4 msk olía
1 meðalstór laukur
1 rauð paprika
1 græn paprika
1 tsk reykt paprika frá La Chinata (hot) (allt í lagi að nota venjulega papriku líka!)
1 tsk kóríander
1 tsk oregano
salt ef vill
1 krukka af Salsa sósu
1 poki af mozzarella osti
26 % ostur eftir smekk
10 litlar Tortillakökur
Byrjið á því að setja olíuna á pönnu og steikið kjúklingabringurnar við vægan hita. Hafið lokið á pönnunni á meðan þær eru að steikjast og gætið þess vel að þær verði ekki brúnaðar að utan.
Á meðan kjúklingurinn er að eldast er laukurinn og paprikurnar skornar í bita. Þegar kjúklingabringurnar eru tilbúnar eru þær teknar af pönnunni. Bætið við örlítið meira af olíu og látið laukinn og paprikurnar mýkjast á pönnunni. Bætið kryddinu út í og látið malla í sirka sjö mínútur.
Skerið kjúklingabringurnar í þunnar sneiðar og bætið út í laukinn og paprikurnar. Á þessu stigi málsins er Salsa sósunni bætt út í. Leyfið þessu að malla í tvær mínútur.
Takið Tortillakökurnar og dreifið ostsneiðum yfir alla kökuna. Síðan er fyllingin sett yfir helming kökunnar og mozzarella osti er stráð yfir. Síðan er kakan brotin saman og sett á ofnskúffu. Hinar kökurnar eru fylltar á nákvæmlega sama hátt.
Stillið ofninn á 200 gráður og bakið í sirka tíu mínútur eða þangað til osturinn er bráðnaður og kökurnar eru orðnar stökkar að utan.
Gott er að hafa ferskt salat með ásamt avókadómauki.

Tandoori kjúklingur

Þessi uppskrift er úr sænsku bókinni minni "Kärlek, oliver och timjan". Bókina gerðu tvær konur eftir að þær ferðuðust um Asíu og Suður-Evrópu og viðuðu að sér miklum matarfróðleik.

fyrir 4
4 kjúklingabringur
4 dl jógúrt
1 1/2 tsk salt
2 pressuð hvítlauksrif
2 msk sítrónusafi
1 kúfuð tsk garam masala
1/2 tsk chiliduft
1 tsk turmerik/gurkmeja
svartur eða hvítur pipar
1 msk olífuolía

Blanda jógurt, kryddum , hvítlauki og sítrónusafa saman. Marinera kjúklingabringurnar í amk 2 klst (frábært að gera yfir nótt). Látið þetta standa í ísskáp. Takið síðan bringurnar úr marineringunni og grillið í ofni eða á útigrillinu. Snúið einu sinni.

Gott að bera fram með Raita (sjá neðan), naan brauði, basmatihrísgrjónum og strengjabaunum.

Raita

Skera 20 cm gúrku í mjög smá teninga. Gerið það sama við 1/2 gulrót. Fínsaxa 1 rauðlauk. Takið kjarnann úr 2 tómötum og skerið aldinkjötið mjög smátt. Blandið öllu þessu með 5-6 dl af venjulegri jógúrt (jógúrt til matargerðar). Bragðbæta með salti og pipar, 1/2 tsk cumin, 1/4 tsk paprikuduft og 2 msk fínsöxuðum kóríander. Látið standa í ca 1 klst til að brögðin komi fram.

Cordon Bleu að hætti Tinu

Þetta er sko uppáhaldsmaturinn hans Matta. Ég elda hann alltaf þegar ég vil vera góð við kallinn. Ég fékk uppskriftina upprunalega frá sænska sjónvarpskokkinum Tinu en er búin að laga hana til og gera hana mína. Með kjúklingabringum er hún alveg namminamm.

fyrir 2

2 kjúklingabringur
ostur
skinka
dijon sinnep
1 egg
hveiti
brauðmylsna (eða svona ströbröd, hvað það er nú á íslensku)
salt og pipar

- fletjið út kjúklingabringurnar eins mikið og þið getið. Ég nota kjöthamar en það má nota kökukefli og berja þær niður.
- leggið á þær ost (okkur finns gott að hafa glás af osti), skinku og smyrið vel með dijon sinnepi. Brjótið saman til helminga og reynið að halda góssinu sem mest inni.
- setjið í 3 skálar: 1 egg sem búið er að hræra saman, smá hveiti og smá brauðmylsnu.
- nú takið þið bringurnar og dýfið þeim fyrst í eggjaskálina, svo í hveitiskálina, loks í brauðmylsnuskálina. Þekið vel. Kryddið með salti og pipar.
- þá hita ég pönnuna, set smá smjör og ólífuolíu á pönnuna. Þegar hún er orðin heit set í kjúllana á pönnuna. Steiki svona 2 mínútur á hvorri hlið.
- Loks setur maður bringurnar inní ofn þar til að þær eru done. Það tekur svona 20-30 mínútur.

Satay kjúklingasalat (frá Vegamótum er mér sagt)

-fyrir sex-

Sex kjúklingabringur, skornar í strimla, kryddaðar með salti og pipar og steiktar á pönnu.

Salatblanda að eigin vali.

Sósa
1 dós kókosmjólk
1 bolli salthnetur
½ ferskt chili
2 msk. sítrónugras, fínt saxað
5 hvítlauksgeirar
salt eftir smekk
2 msk. soyasósa
1 bolli púðursykur
1/2 búnt coriander
3 lauf kaffírlime (fæst í austurlenskum búðum)
kanelduft á hnífsoddi
1/2 paprika, smátt skorin
fennelduft á hnífsoddi
1/2 rauðlaukur smátt skorinn
cayenne pipar á hnífsoddi


Allt hráefnið, sem á að fara í sósuna, er sett saman í pott ásamt tveimur dl af vatni og soðið í hálfa klukkustund.
Í lok suðutímans er maukað eilítið með töfrasprota og saxaðar niður hneturnar og laukurinn.
Salatblöndunni er síðan skipt á sex diska og kjúklingastrimlunum raðað ofan á.
Að síðustu er sósunni hellt yfir.
Borið fram með hvítlauksnanbrauði.

SPÆNSKUR KJÚKLINGARÉTTUR
fyrir 8

8 kjúklingabringur (eða 2 heilir kjúklingar)

marinering:
1/2 hvítlaukur, saxaður
1/4 bolli rauðvínsedik 1/8 bolli oregano
1/2 bolli sveskjur
1/4 bolli ólívur
1/4 bolli kapers
1 bolli ólívuolía
6 lárviðarlauf
salt og pipar, eftir smekk
1/4 bolli steinselja söxuð
1/2 bolli hvítvín
1/2 bolli púðursykur

Setjið allt í skál nema steinselju, hvítvín og púðursykur. Hrærið vel saman og bætið kjúklingnum út í. Látið marinerast í 6-24 klst. Setjið í eldfast mót og bætið þá við steinselju, hvítvíni og púðursykri. Steikið í 180°C heitum ofni í rúmlega 40 mín. Berið fram með t.d snittubrauði og hrísgrjónum. Gjarnan má setja meira af kapers, sveskjum, hvítlauk og ólívum í marineringunni ef vill.
Njótið vel!